आश्विन शुक्ल प्रतिपदा देखि बडा दशैं शुरू भएको मानिन्छ। आज बिहान ९ बजेर १६ मिनेटमा घटस्थापना गरिनु उत्तम रहेको नेपाल पञ्चाङ्ग निर्णायक विकास समितिले जनाएको छ।
आज घरमा विधिपूर्वक दियो, कलश सहित घटस्थापना गरिन्छ। घरमा वैदिक विधिपूर्वक अधिष्ठात्री देवी दुर्गाको आह्वान गरी पूजा आरम्भ हुन्छ। चित्रा नक्षत्र र वैधृति योग परेकाले तिनीहरूको शान्ति गरी घटस्थापना गर्नु शास्त्र सम्मत देखिने समितिले जनाएको छ।
आज बिहानै नित्य कर्म समाप्त गरी नजिकको नदी वा चोखो स्थलबाट बालुवा वा माटो ल्याई गाईको गोबरले लिपपोत गरिएको पूजाकोठा अथवा दशैंघरमा विधिपूर्वक राखेर त्यसमाथि यव अर्थात् जौ रोपिन्छ। यस कार्यलाई जमरा राख्ने पनि भनिन्छ।
आज यवरोपण गरी दुर्गालाई चढाएर विजयादशमीको दिन टीका प्रसादसितै समृद्धिको प्रतीक पहेंलो जमरा लगाइन्छ।
