परासी ९ वैशाख। पश्चिम नवलपरासीको पाल्हीनन्दन गाउँपालिका–४ मा सञ्चालित पाल्ही बहुमुखी सहकारी संस्था लिमिटेडका रकम हिनामिना सम्बन्धी कसुर ठहर भएमा बिगो बराबरको जरिवाना र तीन वर्ष सम्म कैद हुने कानुनी व्यवस्था छ ।
सहकारीको रकम हिनामिना सम्बन्धी कसुर ठहर भएमा सहकारी सञ्चालक समितिलाइ बिगो बराबरको जरिवाना र तीन वर्ष सम्म कैद हुने सहकारी ऐन, २०७४ को दफा १२४ मा व्यवस्था रहेको सरकारी वकिल कार्यालयका सूचना अधिकारी लोधले जानकारी दिनुभयो ।
सहकारीका सञ्चालक समितिका १५ जनाको मिलेमतोमा८५ लाख ८० हजार ७ सय ५५ रूपिया हिनामिना भएको छ ।
सहकारीकाे रकम हिनामिना सम्बन्धी कसुर मुद्दामा तीन जना हाजिर भएका जिल्ला सरकारी वकिल कार्यालयका सूचना अधिकारी काशीराम लोधले बताउनुभयो । उहाँका अनुसार सहकारी दर्ता रहेको राप्ती उपत्यका दाङ [देउखरी] को पत्रबाट मुस्तफा शेखको जाहेरीले वादी नेपाल सरकार भएर जिल्ला अदालतमा सहकारीको रकम हिनामिना सम्बन्धी कसुर मुद्दा दर्ता भएको छ ।
सहकारीको रकम हिनामिना सम्बन्धी कसुर मुद्दा नवलपरासी जिल्ला अदालतमा दर्ता भएपछि प्रतिवादी सुरेश चौधरी [कुर्मी], वीरेन्द्रकुमार यादव र रामसेवक चौधरी [कुर्मी] ले जनही रु पाँच लाख धरौटी राखेर तारेखमा बसेका जिल्ला प्रहरी कार्यालयका सूचना अधिकारी एवं प्रहरी नायब उपरीक्षक वीरदत्त पन्तले जानकारी दिनु भयो ।
“सहकारी संस्थाका सञ्चालक समितिका अध्यक्ष राजकिसोर गुप्ता [तेली],उपाध्यक्ष नाथु माली,सदस्य कमलादेवी कहार, सञ्जय कुर्मी, रवीन्द्र पासी, लेखा संयोजक सन्तराम यादव, जानकी देवी कुर्मी,इजहार धुनिया,प्रमोद यादव, सुग्रिम तिवारी, रामानन्द यादव र व्यवस्थापक मुनलाल यादव हाजिर हुनुभएको छैन”जिल्ला अदालतका सूचना अधिकारी भेषराज खनालले भन्नुभयो ।
उहाँका अनुसार सहकारीको रकम हिनामिना सम्बन्धी कसुर मुद्दा दर्ता भएपछि मुद्दामा उल्लेख गरिएका १५ जनालाई जिल्ला अदालतले पक्राउ पुर्जी सहित ३५ दिन भित्र अदालतमा हाजिर हुन आउनु भनी पत्र पठाइएको छ ।
