खरबुजा खेती गर्ने बेला भारतीय किसानहरूले आर्गेनीक तथा रसायनीक मल खेतमा बढी प्रयाेग गरेर खरबुजा काटिसकेपछि मुमफलीकाे सिजनमा जग्गाधनीहरू मुमफली खेती गर्दा उत्पादन बढी भएकाे प्रतापपुर गाउँपालिका–८ निवासी प्रमोद सहानीले बताए ।
प्रतापपुर गाउँपालिका–६ स्थित २० बिघा जग्गामा खरबुजा खेती गरिएको छ । यहाँ भारतको उत्तर प्रदेश र हरियाणका बीस घरपरिवारले खेती गरेका हुन् ।
प्रतापपुर गाउँपालिका–६ का वडाध्यक्ष केशव प्रसाद अधिकारीका अनुसार भारतबाट आएर प्रतिबिघा वार्षिक रु ६० हजारका दरले भाडामा लिएर भारतीय नागरिकले खरबुजा तथा तरकारीखेती गरिरहेका छन् ।
गाउँपालिका–६ चोर्नीयाको बगरमा गरिएको खरबुजाखेतीबाट किसानले मनग्य आम्दानी गरिरहेका छन् । व्यापारीहरूले किसानको खेतबाटै खरबुजा खरिद गर्ने गरेका छन् ।
भारतीय निवासी किसान आरिफ खानले तीन वर्षदेखि आफूहरूले यहाँ खरबुजा तथा तरकारीखेती गर्दै आएको बताउनुभयो । उहाँका अनुसार प्रतिकेजी रु २० मा खरबुजा बिक्री हुने गरेको छ । विगतमा राम्रै आम्दानी भए पनि यस वर्ष खरबुजामा फङ्गस् रोग लागेर सोचेअनुसार उत्पादन नहुँदा केही घाटा लागेको आनको गुनासो छ ।
यहाँ उत्पादित खरबुजा काठमाडौँ, नारायणघाट, बुटवल, पोखरा, भैरहवा, चितवन सम्मका व्यापारीले खेतमै आएर लैजाने गरेका छन् ।
