काठमाडौ १६ भदाै।नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सीमा समस्या समाधानका लागि सरकारले कूटनीतिक पहल लिनुपर्ने बताएका छन् ।
सोमबार साँझ सम्पन्न एशिया प्रदेश संगठन समितिको विस्तारित बैठकलाई सम्बोधन गर्दै पार्टी अध्यक्ष प्रचण्डले कूटनीतिक पहलको आवश्यकता रहेकाे औंल्याए ।
प्रधानमन्त्रीत्वकालमा भारत भ्रमणका क्रममा लिपुलेक र कालापानीको विषयमा भारतीय प्रधानमन्त्री सँग संवाद गरेर सार्वजनिक घोषणा गराएको स्मरण गराउँदै उनले भने, ‘सीमा समस्या कूटनीतिक पहलबाट नै समाधान हुन्छ भन्नेमा माओवादी केन्द्र स्पष्ट छ ।’
उनले भने, ‘कमरेडहरूलाई यो पनि थाहा हुन पर्छ । राष्ट्रियताको बारेमा, नेपालको सिमाना र लिपुलेकका बारेमा म पछिल्लोपटक प्रधानमन्त्रीको रूपमा भारत भ्रमण गएकाे बेला कालापानी र लिपुलेकको विषयमा गम्भीर ढंगले कुरा गरी इतिहासमा पहिलो पटक मेरो नेतृत्वमा रहेको सरकारले नै भारतीय प्रधानमन्त्री मोदीलाई नेपाल–भारतको सीमा समस्या संवादबाट समाधान गरिन्छ भनेर सार्वजनिक घोषणा गर्न लगाएको हो।
मैले मिहिनेत गरेर समाधान गर्नु पर्छ भन्नेमा पुर्याएका थिए।अहिलेको सरकारले कूटनीतिक पहलबाट सीमा समस्या समाधान गर्न पहल लिनुपर्छ भन्नेमा माओवादी केन्द्र स्पष्ट छ ।’
बैठक सम्बोधन गर्दै अध्यक्ष प्रचण्डले प्रवासी क्षेत्रमा क्रियाशील नेता–कार्यकर्तालाई पार्टीको मूलधारमा ल्याउन विशेष प्रयासमा रहेकाे जानकारी दिए । उनले भने,‘पछिल्लो स्थायी समितिको बैठकपछि विभिन्न प्रदेशहरूको बैठक बस्ने क्रम जारी छ।
केही प्रदेशहरूको बैठक बसेका छौं।अहिले पाँचौं प्रदेशको बैठक हो। अहिले समयकाे अभाव भएर, छिट्टै प्रवासका सबै साथीहरूको कुरा सुन्ने गरी अन्तरक्रियात्मक अर्को बैठक बस्ने प्रतिबद्धता व्यक्त गर्दछु ।
अहिले प्रवासमा ठूलो संख्यामा जनशक्ति रहेका हुँदा प्रदेशहरू बढाउने र प्रवासलाई महत्व दिइएको छ।
‘पार्टीले राम्रो सँग महसूस गरेको छ कि मध्यपूर्व र एसियालाई महत्व नदिए पार्टीलाई राम्रोसँग अगाडि बढाउन सकिन्न । प्रवासमा रहेका साथीहरूलाई पार्टीमा महत्व दिने गरी थप निर्णय गर्छौं उनले भने ।
एसियामा रहेका कार्यकर्ताको योगदानप्रति आभार व्यक्त गरेको बताउँदै उनले भने,प्रवासी जनशक्तिलाई बेवास्ता गरेर पार्टी अघि बढ्न सक्दैन ।
