परासी ।डेढ किलोमिटर सडक निर्माणका लागि दाेस्राे पटक म्याद थपिएकाे छ। भारत सँग जोडिएको महेशपुर मूल भन्सारको सडक निर्माणका लागि दोस्रो पटक म्याद थपिएकाे हाे।
बर्दघाट सुस्ता पश्चिम नवलपरासी महेशपुर देखि हरपुर सम्म एक किलोमिटर र सुनवल बजारमा पाँच सय मिटर सडक निर्माण गर्न २०८० बैशाखमा भौतिक पूर्वाधार तथा यातायात मन्त्रालय सडक विभागअन्तर्गत सडक डिभिजन कार्यालय बुटवल र गौरीशंकर हिमालयन कन्ट्रक्सन कम्पनीबीच सम्झौता भएको थियो।
हाल सम्म ४० प्रतिशत काम भएको डिभिजन कार्यालय बुटवलका प्रमुख जीवेन्द्र मिश्रले बताए। स्थानीयको भौतिक संरचना,बिजुलीको खम्बा सार्नुपर्नेलगायत कामका कारण ठेकेदारले समयमै काम सम्पन्न गर्न नसकेको प्रमुख मिश्रको भनाइ छ।
महेशपुर सडकको काम सम्पन्न गर्न दोस्रो पटक (अन्तिम) म्याद थप गरिएको सडक डिभिजन कार्यालयका इन्जिनियर सुशील पौडेलले बताए। थपिएको म्याद सम्म सडकको काम सम्पन्न नगरेपछि ठेकेदारलाई कानून बमोजिम कारबाही गरिने उनको भनाइ छ।
बिजुलीको खम्बा लगायत संरचना सार्नु पर्ने तथा निर्माण समाग्री नपाएपछि समयमा काम सम्पन्न गर्न नसकिएको गौरीशंकर हिमालयन कन्ट्रक्सन कम्पनीका सञ्चालक मणिराम लामाले बताए। आगामी कात्तिक महिनासम्म काम सम्पन्न गर्नेगरी निर्माण भइरहेको उनले बताए।
निर्माण व्यवसायीले सडकको काम समयमा नगरेपछि यति बेला वर्षा भएपछि भारतबाट आउने मालवाहक सवारी तथा यात्रुलाई हिलोमा आवत जावत गर्न समस्या भइरहेको पाल्हीनन्दन गाउँपालिका-२ का वडाध्यक्ष जगदीश गुप्ताले बताए।
उनका अनुसार जिल्लाको पाल्हीनन्दन गाउँपालिका-१ महेशपुर देखि भक्सीपुर सम्म ढल निकास सहित सडक निर्माणका लागि गौरीशंकर हिमालयन कन्ट्रक्सन कम्पनीले ठेक्का लिएको हो।
