परासी।जापानीज इन्सेफ्लाइटिसबाट पश्चिम नवलपरासीमा तीन जनाको मृत्यु भएको छ।जिल्लाकाे बर्दघाट नगरपालिका-१२ का ७४ वर्षीय पुरुष, सरावल गाउँपालिका-१ का ६२ वर्षीय पुरुष र प्रतपापुर गाउँपालिका-१ का ५० वर्षीय पुरुषको उपचारका क्रममा मृत्यु भएको हो।
विगत डेढ महिनाकाे अवधिमा उनीहरुको मृत्यु भएको स्वास्थ्य कार्यालय नवलपरासीका निमित्त प्रमुख भेषराज शर्माले जानकार दिए। सङ्क्रमण विरुद्धको खोप नलगाएका तीन जना वृद्धको जापानीज इन्सेफ्लाइटिस्बाट मृत्यु भएको उनले भने।
लामखुट्टेको टोकाइबाट जिल्लामा नौ जनामा डेङ्गी रोग सङ्क्रमण पुष्टि भइसकेको छ।सरसफाइ नहुँदा तीव्र गतिमा सङ्क्रमण फैलिने गरेको छ।
जापानीज इन्सेफ्लाइटिस् र डेङ्गीको जोखिमलाई मध्यनजर गर्दै स्थानीय तह देखि नै लामखुट्टे नियन्त्रण तथा डेङ्गी रोकथामका लागि जनचेतना फैलाउने काम भइरहेको छ।
जापानीज इन्सेफलाइटिस् तथा डेङ्गी रोग लागेका हाँस, कुखुरा जस्ता चरा चुरुङ्गी र सुँगर–बङ्गुर जस्ता सङ्क्रमित जनावरलाई लामखुट्टेले टोकेर मानिसलाई टोकेमा याे सङ्क्रमण अरूमा सर्ने गर्दछ । एडिस एजिप्टी प्रजाति लामखुट्टेले सङ्क्रमित व्यक्तिलाइ टाेकेर स्वस्थ मानिसलाइ टाेकेपछि सङ्क्रमण फैलिने गर्दछ निमित्त प्रमुख शर्माले बताए ।
डा.नुरूल हाेदाले भने डेङ्गीका सामान्य लक्षण उच्च ज्वरो, टाउको दुखाइ, आँखा भन्दा पछाडि दुख्ने, स्नायु र मांसपेशी दुख्ने खाना नखाने जस्ता लक्षण देखिन्छ। समयमा उपचार नपाएपछि सङ्क्रमितको मृत्यु हुनसक्छ ।
जापानीज सङ्क्रमण इन्सेफलाइटिस् व्यक्तिको मस्तिष्कमा हुने क्युलेक्स प्रजातिको लामखुट्टेको टोकाइबाट सर्ने एक प्रकारको गम्भीर रोग हो।यो रोग लागेपछि मस्तिष्क सुन्निने,पक्षाघात हुने, रिङटा लाग्ने बेहोस हुने,मृत्यु समेत हुन सक्छ डा.नुरूल हाेदाले बताए।
